 Ньурба куоратыгар балаҕан ыйын 21-22 күннэригэр Бүлүү бөлөх улуустарын үөрэнээччилэрин регионнааҕы байыаннай-спортивнай II-с «Патриот» оонньуулара ыытылынна.
Бу тэрээһин Кыайыы 75 сылын көрсө биир дойдулаахтарбыт : Сэбиэскэй Сойуус Геройдара Н.Н.Чусовской, Н.П.Кудряшов, Социалистическай Үлэ Геройа М.Ф.Алексеев, Россия Геройа Д.Ю.Кондратьев, сэрии бэтэрээнэ, Аҕа дойду сэриитин II степен орден кавалера, «Бойобуой үтуөлэрин иһин» 2 мэтээллээх, «Норуоттар доҕордоһуулара» орденнаах Ф.С Донской 100 сааһыгар ананар тэрээһин .
МАУ ДО ЦДНТТ иһинэн үлэлиир улуус оҕолорун түмсүүлэрин сүрүннүүр «Ньурба эрэлэ» түмсүү эмиэ актыыбынай кыттыыны ыллыбыт. Урут да билигин да оҕону патриотическай тыыҥҥа иитиигэ элбэх үлэ ыытыллар.
Дьокуускайдааҕы кадеттар оскуолаларын иитиллээччилэрин кытта көрүстүбүт. Сарсыардаттан бэйэбит тэрилтэлэрбитигэр экскурсиялаттыбыт, үлэбитин-хамнаспытын кэпсээтибит, оҕолор араас военнай макеттары олус сэргээн көрдүлэр. Ньурба улууһун туһунан кэпсиир слайдалары, оҕолор онорбут видеороликтарын, ситиһиилээх оҕолор тустарынан кэпсээтибит, көрдөрдүбүт, Ньурбабыт кэрэ-бэлиэ, Ытык сирдэринэн сырытыннардыбыт. Экскурсиябытын ырыаҕа ылламмыт, хоһооҥҥо элбэхтик хоһуллубут Куочайтан саҕалаатыбыт. Онно биир дьикти, айылҕа бэлэҕэ күүтэн турар эбит!. «Таптал аллеятыгар» тиийэн автобустан тахсааппытын кытта, кыталыктар көтөн таҕыстылар. Кынаттара харалаах. Бары соһуйуу, үөрүү-көтүү бөҕө буоллубут. Хаста да эргийэн кэлэ- кэлэ көтөн аастылар. Биһиги хаһан да маннык дьикти көстүүнү көрбөтөх буолан олус дьоллоннубут. Айылҕабыт бэйэтэ анаабыт курдук бэлэх онордо. Бу кадет оҕолортон Слава диэн уол Ньурбаҕа олоро сылдьыбыт, салайааччылара Рожин С.И дьонноро эмиэ Куочайтан төрүттээхтэр эбит. Дьикти көстүү кэннэ кинилэр дойдуларын арыылаах алаадьыннан аһатан, сиэр-туом толорон махтаннылар. Салгыы оҕолорго бу кэрэ сиргэ Ньурба дьоно-сэргэтэ улаханныын –кыралыын кэлэн сынньаналларын, күүс –күдэх ылалларын, араас тэрээһиннэри манна ыыталларын билиһиннэрдибит.
“Таптал аллеята» кырдьык да кэрэ көстүүнү бэлэхтээтэ. Сэлэлии кэккэлээн турар хатыҥнар төбөлөрүнэн күн көмүс сардаҥалара үөһэттэн кутуллан турара остуоруйа дойдутун санатта. Ол аннынан оҕолор баҕа санаалара туоларыгар эрэнэн туран биир- биир аллея устун боччумуран хаамтылар, фотосессиялаатылар.Салгын ырааһа- чэбдигэ, хатыҥ дыргыл сыта, күн мөһүүрэ сардаҥата, үтүө- мааны көтөрдөр көрсүбүттэрэ оҕолорго умнуллубат түгэн буолла.
Салгыы “Кэлтэгэй арыыга» 3 эһэни көрө бардыбыт. Оҕолор тиийээт да волонтердар буолалларын быҺыытынан территорияны үөрэ-кэтэ ыраастаатылар. Сылдьыбыт сирдэрин куруук ыраастыыр, хомуйар үтүэ үгэстээхтэр эбит.
Онтон “Аар хатыҥҥа» тиийдибит. Хатыҥмыт өссө маанымсыйан , улаатан -тупсан көрүстэ. Тула өттө барыта ып-ыраас , сып-сырдык. Бу хатыҥҥа Айыыһыт хотун дьиэлэммитин, ньурбалар киэн туттар Ытык сирбит буоларын кэпсээтибит. Кыһыл кинигэҕэ киирбит фиолетовай өҥнөөх ньургуһун үүнэрин, оҕолорго манна араас тэрээһиннэр ыытыллалларын, дьон-сэргэ ыраастанан, сынньанан барарын кэпсээтибит. Оҕолор бары “Аар хатыҥы” ытыктыылларын биллэрэн сиэр-туом толордулар, махтаннылар, ыраастаннылар.
Оҕолор сөҕөн-махтайан, астынан бардылар. Ньурба сирэ кырдьык да олус кэрэтин биллилэр. Оттон биһиги төрөөбүт дойдубут барахсан кэрэтиттэн эмиэ наһаа астынныбыт, киэн тутуннубут.
Бу күн киэһээтигэр кэлбит бары кыттааччы оҕолорго Ньурба №1 оскуолатын спортзалыгар «Доҕордоһуу киэһэтин” «Ньурба эрэлэ» түмсүү активистара ыыттылар. Ньурба № 1 «Кэскил», Ньурба № 2 “Егоровцы”, НТЛ “Компас”, Убайаан “Дружба”, Антоновка “Чэчир” түмсүүлэрин лидердэрэ салайааччыларын кытта бэрт сэргэхтик ыыттылар. Оҕолор бары олус көхтөөхтүк кыттан, биир саастыылахтарын кытта билсэн, оонньоон- үнкүүлээн, зал иһэ отой оргуйан олордо. Бары ыалдьыт оҕолор астынан тарҕастылар.
МАУ ДО ЦДНТТ, “Ньурба эрэлэ” педагог организатора В.Я Давыдова, Ньурба к.
|
