«Мин Айыы сирин оҕотобун ” бырайыак чэрчитинэн “Ситиһиилээх буолуохха ” рубрикаҕа “Юный шашист“ кулуупка дьарыктанар икки оҕо ыалдьыттаатылар.
Ньурба №1 оскуолатын 3 кылааһын үөрэнээччитэ Тимофеева Даяна уонна ННОШ №3 2 кылааһын үөрэнээччитэ Кириллин Тимур. Кинилэр саҥа саҕалаан эрэр да буоллаллар ситиһиилэрэ, кэпсииллэрэ оҕолорго холобур буолаллара элбэх.
Даяна Тимофеева дуобакка дьарыгын 1 кылаастан саҕалаабыт. Бастакы ситиһиитэ «Открытие сезона по русским шашкам среди первоклассников» 2 миэстэ, “Турнир по русским шашкам на призы Деда Мороза” 1 миэстэ буолбут. Онтон ыла ыытыллар күрэхтэргэ кыттан куруук 1-4 миэстэттэн түспэккэ элбэх мэтээл, кубок харчыннан стипендия, араас бириис бөҕө ылбыт. Барыта Даяна Ньурбаттан саҕалаан Чаппандаҕа, Чукаарга, Сунтарга, Үөһээ Бүлүүгэ, Бэрдьигэстээххэ, Дьокуускайга, Санкт- Петербурга тиийэ араас таһымнаах күрэхтэргэ кыттыбыт. 40 мэдээллээхпин диир. Сотору Сочига бараары эрчиллэ сылдьар эбит.
Оҕолор бэйэлэрин саастыылаахтара буолан сүрдээҕин интириэһиргээтилэр, мэдээллэрин, кубоктарын тутан-хабан көрдүлэр, боппуруос бөҕө да биэрдилэр .
Түмүккэ Даяна 7 оҕоҕо дуобакка сеанс биэрдэ. Оҕолор син киирсэ сатаатылар да бары хоттордулар. Сорох чыпчырынна. Сорох сонньуйда, үөһэ тыынна. Сорох хараҕа ууланна...
Иккис оҕо Кириллин Тимур. Кини бу кылаас оҕолорун кытта биир кылааска үөрэнэр. Эмиэ Даяналыын бииргэ эрчиллэллэр, биир күрэхтэргэ сылдьаллар. Ситиһиилэрэ эмиэ элбэх.
Даяналаах Тимур оҕолорго хайдах эрчиллэллэрин, ханнык күрэхтэһиилэргэ кыттыбыттарын, ситиһиилэрин, режимнарын туһунан кэпсээтилэр, боппуруостарга эппиэттээтилэр. Кэтэ сылдьар анал формаларын оҕолор сонурҕаан көрдүлэр.
Кинилэр төһө да элбэхтик күрэхтэһиилэргэ сырытталлар үөрэхтэригэр үчүгэйдик үөрэнэллэр эбит.
Дуобатынан дьарыктанар оҕо:
- толкуйдуур дьоҕура күүскэ сайдар, истибитин өйүгэр умнубаттыы хатыыр
- түргэнник араас ситуацияттан толкуйдаан тахса үөрэнэр
- стресскэ ылларбат, санаата күүстээх буолар
- бириэмэтин сөпкө аттарар, сатабыллаахтык күнүн былаанныыр
- элбэх оҕону-дьону кытта алтыһар
- сири –дойдуну көрөр, төрөөбүт дойдутунан киэн туттар
- төрөппүттэрин сыаналыыр
- бэйэтигэр эрэллээх ситиһиилээх буолар.
Кырдьык да оннук курдук. Бу оҕолор тутта-хапта сылдьаллара, бэйэлэригэр эрэллээхтэрэ, күүстээх санаалаахтара тастарыттан да көстө сылдьар.
Оҕо сайдарыгар улахан көмөнү төрөппүттэр оҥороллоро саарбаҕа суох. Ол курдук бу оҕолор да төрөппүттэриттэн көстөр. Бу көрсүһүүгэ Даяна төрөппүттэрэ Нина Владимировна уонна Семен Герасимович кыыстарын кытта эмиэ кэлэн, суолта биэрэн кыттыыны ыллылар, оҕолорго сүбэ-ама биэрдилэр. Кинилэр Даянаны элбэх күрэхтэһиигэ кытыннаран салгыы сайдарыгар бары кыахтарын туһаналлар. Даяна кырабын диэбэккэ билигин 2 спортивнай разрядтаах. Бу улахан ситиһии. Бу сайын Сочига буолар күрэххэ эмиэ бараары бэлэмнэнэ сылдьар.
Оттон Тимур Кириллин эмиэ саҥа тахсан эрэр сулус, киниэхэ эмиэ ситиһиилэри баҕарыаҕыҥ! Кини туһунан өссө да кэпсиэхпит.
Биһиэхэ Ньурбаҕа ситиһиилээх, араас талааннаах оҕолор элбэхтэр. Кинилэргэ бириэмэтигэр сөптөөх эйгэни тэрийэн сайдар суолларын олуктаран оҥорон биэриэххэ наада. Маннык ситиһиилээх оҕолор элбэх оҕону бэйэлэрин холобурдарынан үчүгэйгэ, сырдыкка , кэрэҕэ , ситиһиилээх буоларга угуйаллар.
Биһиги ЦДНТТ коллектива Даяна Тимофееваҕа Сочига барарыгар ситиһиини баҕаран туран бэйэбит сэмэй кылааппытын киллэрэн харчыннан көмөлөһөргө быһаарынныбыт. Атын да дьону маннык ситиһиилээх кырачаан оҕолорбутугар саҥа тахсан эрэр сулустарга көмөлөһө туруохтара диэн баҕа санаабытын этэбит.
««Мин Айыы сирин оҕотобун” бырайыак салайааччыта, ЦДНТТ педагога В.Я Давыдова.
| 
