Главная | Регистрация | Вход | RSSВторник, 18.12.2018

МАУ ДО ЦДНТТ г.Нюрба

Меню сайта
Статистика

Онлайн всего: 1
Гостей: 1
Пользователей: 0
Главная » 2018 » Ноябрь » 22 » Үгэс буолбут тэрээһиммит салҕана турдун....
04:16
Үгэс буолбут тэрээһиммит салҕана турдун....

Каникул... Хас биирдии оскуола оҕото саамай күүтэр кэмэ буолар. Ол курдук, ханнык баҕар оҕо бу бэриллибит бириэмэтин бэйэтин сөбүлүүр интэриэһинэн хайдах кыалларынан туһалаахтык, интэриэһинэйдик атаарарга дьулуһар.

Биһиги «Калейдоскоп» оҕо телестудията, салайааччыбытын Элена Евгеньевнаны кытары оҕолорго аналлаах киинэлэри устарбытын сөбүлүүбүт. Ол курдук, күһүҥҥү каникулга, сылын аайы биһиги үгэс быһыытынан бэйэбит улууспут нэһилиэктэригэр тахсан киинэ устабыт. Үксүн оскуола оло5ун сырдатар киинэлэри оҥоробут.

Быйылгы үөрэх дьылыгар маҥнайгы сынньалаҥмытыгар чугастыы сытар, интэриэһинэй дьонноох-сэргэлээх , кыраһыабай айылҕалаах Сүлэ диэн нэһилиэккэ киинэ устан киирбиппит. Бу сырыыга киинэбит инники устубут киинэлэрбитинээҕэр уратылаах. Биһиги үйэбитигэр дораманы билбэт киһи суоҕа буолуо. Дорама диэн корейскай, кытайскай, тайваньскай уонна гонконгскай сериаллары ааттыыбыт. Ол эрэн, аҕыйах киһи билэрэ буолуо, аан маҥнай “дорама” дьоппуон “тэрэби” диэн тылыттан үөскээбитин. Дорамаҕа уһуллар артыыстар – олус кыраһыабайдар, дьиҥнээх бэйэлэрин эйгэлэригэр маастардар. Кинилэр хайдахтаах курдук итэҕэтиилээхтик оруолларыгар киирэллэрий? Кинилэр күөх экран нөҥүө үөрбүттэрин, ытаабыттарын, соһуйбуттарын, кыыһырбыттарын дьон-сэргэ ылларан туран көрөр. Аны таҥастара, туттар тэриллэрэ барыта наһаа үчүгэй. Дорама жанрдара араас: комедия, детектив, ужас, таптал темалара.

Холобура, биһиги ордук оскуола оҕолорун, кыыстаах уол тапталларын туһунан көрөрбүтүн ордоробут.

Ол курдук, киинэбитин бу сырыыбытыгар дорамаҕа майгынныыр гыммыппыт. Киинэбит ис хоһоонун туһунан кылгастык кэпсээтэххэ маннык: Сайнаара диэн сүрүн геройбут кими да таптаабат, куруубай, кытаанах характердаах кыыс. Кини үөрэҕэр үчүгэй, оскуолатыгар соҕотох “Сулус” буола сырыттаҕына Аман диэн саҥа уол кэлэр. Аман –иккис сүрүн герой,кини өйдөөх, олус үчүгэй майгылаах оҕо. Кыыс олимпиадаларга куруутун бастыыр буолан саҥа кэлбит уол маҥнайгы миэстэ буолбутугар кыыһыра саныыр. Дьэ, бу кэннэ туох буолбутун күндү көрөөччүлэрбит биһиги ютуб каналбытыгар көрөөрүҥ.

Киинэбит сценарийын бэйэбит телестудиябыт иккис сылын сылдьар ахсыс кылаас кыргыттара –Николаева Ира, Дмитриева Джамиля, Старостина Света, Гурьева Лия, салайааччыбытын Элена Евгеньевнаны кытары суруйбуттара. Кыргыттар киинэ устууга бастакы холонуулара буолла. Олох “маладьыастар” диэн биһиги улахаттар хайҕаатыбыт. Онтон киинэбитин 8кылаас үөрэнээччилэрэ Горбатов Никита, Бускаров Руслан уһуллулар, кинилэр операторскай үлэҕэ эмиэ бастакы холонуулара.

Биһиги 11 кылаас үөрэнээччилэрэ экзаменнаахпыт диэн аккаастаммакка эрэ киинэ устууга салайааччыбытыгар илии-атах буоллубут. Хартасова Варя, Семенова Луиза киинэҕэ уһуллар оҕолору барыларын кырааскалаабыттара уонна үҥкүү туруорбуттара.

Киинэбит сүрүн геройдарынан Ньурбачаан орто оскуолатын 8 кылааһын үөрэнээччитэ Николаев Аман уонна Сүлэ орто оскуолатын 6 кылааһын үөрэнээччитэ Петрова Милена толордулар.

Сүрүн геройдарбытыттан интервью ыллым:

-Киинэҕэ майнайгы уһуллуугут дуо? Уһуллар хайдах дии санаатыгыт?

Аман: Киинэҕэ бастакы уһуллуум,тус бэйэм олус сөбүлээтим.

Милена: Мин киинэҕэ иккис уһуллуум буолар, бастакыбын эмиэ “Калейдоскоптар”сайын уһулбут киинэлэригэр быстах оруолга кыттыбытым . Онон сүрүн оруолу толорор, бу мин майнайгы холонуум. Санаабар барыта үчүгэйдик ааста, ол гынан баран ыарахаттар бааллар этэ.

-Киинэҕэ сүрүн оруолу толорор хайдах дии санаатыҥ?

Милена: Ыарахан соҕус эбит, ордук ытааһыннаах,турукка киирэрдээх түгэннэргэ.

Аман: Миэхэ тус бэйэбэр, кыратык долгутуулаах этэ.

-Ордук тугу сөбүлээбиккитий киинэ устарбытыгар?

Аман: Мин оҕолор кыһаллалларын, өйөбүл-тирэх сылдьыбыттарын сөбүлээбитим.

Милена: Мин барытын наһаа сөбүлээтим.

-Киинэҕэ уһуллубут саамай умнуллубат түгэниҥ?

Милена: Мин бу ааспыт саамай бастыҥ күннэри, бастакы киинэҕэ сүрүн оруолга холонуубун хаһан да умнуом суоҕа.

Аман: Мин саамай умнуллубат түгэннэрбинэн буолар – киинэ бүтэһигэр Миленалыын мастарыскыайга уонна оскуолаҕа өйдөспөппүтүн уһулбут кэмнэри.

- Туох ба5а санаалааххытый?

Аман: Үөрэхпэр кыһаллан, үөрэхтээх киһи буола улаатарга, барытыгар харса суох кыттан иһиэм.

Милена: Мин саамай улахан баҕа санаам, киинэҕэ иккистээн сүрүн оруолга уһуллааһын.

-О5олорго тугу ба5арыа этигитий?

Милена: оҕолорго баҕарыам этэ доруобуйаны, туйгун үөрэҕи, киинэҕэ устар уонна уһуллар оҕо ахсаана элбиирэ буоллар...

Аман: Үөрэхтэригэр кыһалынныннар, барыларыгар кытаанах доруобуйаны, үрдүк ситиһиилэри.

-Сахалар киинэлэрэ отут сылынан Аан дойдутааҕы таһымҥа тахсыа дии саныыгыт дуо?

Аман: Тахсан бөҕө буоллаҕа дии, бары бииргэ сиэтиспитинэн түмсүүлээхтик уһуллан истэхпитинэ элбэҕи ситиһиэхпит.

Милена: Мин санаабар, тахсара буолуо. Тоҕо диэтэргин, төрөөбүт дойдубут күнтэн күн сайдан иһэр. Биһиги киинэлэрбит омуктар киинэлэрин курдук аан дойду таһымыгар тахсыаҕа диэн эрэнэбин.

-Киинэҕэ уһуллуу оҕолорго туох туһалаах дии санаатыгыт? Тугу биэрэрий?

Милена: Киинэ кэнниттэн оҕолор кыбысталлара сүтэр. Аһаҕас, лидер буолаллар. Киинэ – история буолан хаалан хаалар. Кэлин киинэни хас эрэ сылынан биһиги улаатан баран көрүөхпүтүн сөп.

Аман: Оҕолор киинэҕэ уһуллан бириэмэлэрин туһалаахтык атаараллар. Оҕолорго сомоҕолоһууну, түмсүүнү биэрэр. Киинэ устар интэриэһинэй, оҕо сайдыытыгар туһалаах буолар.

Түгэнинэн туһанан Сүлэ орто оскуолатын директорыгар Иван Гаврильевич Тобоновка, минньигэстик аһаппыт повардарбытыгар, оскуола бүттүүн коллективыгар,чуолаан Зоя Самуиловнаҕа, Айталина Ивановнаҕа, саҥа доҕотторбутугар, бары уһуллубут оҕолорго,күндү учууталбытыгар Элена Евгеньевнаҕа улахан махталбытын тириэрдэбит! Үтүө үгэспит ситимин быспакка,оҕолор элбэх киинэлэри оҥорон таһааралларыгар баҕарабыт.

Аланнырова Эсланда – 11 кылаас, “Калейдоскоп” оҕо телестудиятын иитиллээччитэ.

 

 

Просмотров: 9 | Добавил: juuujuuu | Рейтинг: 0.0/0
Всего комментариев: 0
avatar
Вход на сайт
Поиск
Календарь
«  Ноябрь 2018  »
ПнВтСрЧтПтСбВс
   1234
567891011
12131415161718
19202122232425
2627282930
Архив записей
Друзья сайта
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2018
    uCoz