« Ситиһиилээх буолуу төрдө туохханый?» Эппиэтэ элбэх. Онтон биирдэстэрэ бэйэҕэ сөптөөх дьарыгы булуу. Онтон бэйэннэн астыныы, салгыы ис кыаҕы сайыннарыы. Бэйэҕэ сөптөөх дьарыгы булан дьарыктаныы киһиэхэ хас баҕарар саастан саҕаланыан сөп.
Ол туоһутунан биһиги ыҥырыылаах ыалдьыттарбыт буолаллар. Ыалдьыттарбыт сиппит-хоппут уопуттаах коллекционер Лазарева Розалия Ильинична, төрөппүт Кириллина Яна Прокопьевна, кылаас салайааччыта Охлопкова Евгения Геннадьевна, бииргэ үөрэнэр оҕолорбут Иванов Леня , Иванова Юлиана.
Лазарева Р.И мунньар коллекцията олус элбэх. Биһиэхэ кэлэригэр кыра саастаах оҕолорго сөптөөҕү холобур суруйар ручкалаыр, брошкалары, оҕо сааһын минньигэс кэмпиэттэрин сууларын, пааранан статуэткалары илдьэ кэлбитэ.
Кириллина Я.П үп үлэһитэ буоларын быһыытынан харчы коллекциятын аҕалбыт. Үйэ сайдан анал 3 Д приложениены туһанан харчыга сыһыара туппута арай харчыбыт ойуута хамсаан кэлэн оҕолору соһутта. Харчыбытыгар баар массыналар сүүрэн, пароходтар өрүс устун устан бардылар. Харчы историятын кэпсээтэ. Оҕото Кириллин Тимур ийэтин кытта тэбис тэҥҥэ кэпсээн көрдөрөн барда.
Кылааспыт салайааччыта Охлопкова Е.Г саҥа саҕалаан эрэр коллекционер буолла. Төбөҕө кэтиллэр араас омук бэргэһэлэрин, түбэтиэйкэлэрин мунньубут. Аан бастаан оҕотугар үҥкүүлүүрүгэр бэргэһэ тикпититтэн саҕаламмыт. Билигин коллекциятын арааһа элбээбит. Хас биирдиилэрин историяларын кэпсээтэ. Оҕолор бары кэтэн көрдүлэр араас омук дьоно представителлэрэ буола түстүлэр.
2 “ а “ кылаастар күн аайы көрөр, биир паартаҕа олорор оҕолоро эмиэ коллекция мунньан эрэллэр эбит. Юлиана холодильникка сыстар магниттары мунньан саҕалаабыт. Киниэхэ ити мунньубут дойдуларыгар сылдьан билиитэ өссө кэҥииригэр баҕардыбыт. Леня уол оҕо быһыытынан диназаврдары мунньар эбит. Леня таах мээнэ мунньар эрэ оҕо буолбатах эбит. Хас биирдиилэрин тустарынан улаханнык астынан туран кэпсээн киирэн барда. Ханнык диназавр хаһан, ханна баар буолбутун, тугунан аһыырын, быһыытын -таһаатын , хайдах көмүскэнэрин барытын кэпсээн олус сөхтөрдө. Аттыгар диназаврдарын туһунан кинигэлэрин эмиэ көрдөрдө. Уолбут отой итийэн -кутуйан туран кэпсээтэ, бириэмэ уһуна буоллар күнү быһа да кэпсиэ эбит. Бары даҕаны олус астынныбыт.
Оҕолор элбэҕи билэн –көрөн , тутан-хабан оннооҕор кэтэн көрөн астыннылар. Боппуруос бөҕө биэрдилэр. Розалия Ильинична оччотооҕу кэмпиэт сууларын бэлэхтээн өссө үөрдүлэр. Баҕар ким эмит онтон саҕалаан эмиэ мунньуо. Таах мээнэ сылдьыахтааҕар туһалаах дьарыктаах киһини ситиһиилээх буоларга сирдиирин оҕолор хаппардарыгар хатаабыттара буолуо диэн эрэниэҕи баҕарыллар. Кэпсиир да, истэр да оҕолор дьон ортотугар санааларын этэ саҥара үөрэнэллэр,билиилэрэ кэҥиир, бэйэлэрин тэҥнээхтэрин, улахан дьону көрөн идея ылан , үчүгэйгэ тардыһаллара саарбаҕа суох.
ЦДНТТ директора Ермолаева А.С бу тэрээһиммитигэр кыттыыны ылла. Оҕолорго баҕа санаатын эттэ, сүбэ-ама биэрдэ, оҕолорго,улахан дьонно кыттыбыттарын туоһулуур сертификат туттарда.
Түмүккэ Миронова Настя чуор куолаһынан барыларын эҕэрдэлээн ырыа бэлэхтээтэ, хаартыскаҕа түстүбүт.
Тэрээһиммит табылынна оҕо, төрөппүт, учуутал, профессионал коллекционер бары биир долгуҥҥа сырыттыбыт. Оҕолорбут ситиһиилээх буолалларыгар өссө биир олук уурдубут.
Ким сөбүлүүр дьарыктаах ол сайдыылаах, билиилээх, ситиһиилээх!
«Мин Айыы сирин оҕотобун» бырайыак салайааччыта , ЦДНТТ педагога Давыдова В.Я
| 
